Инсьӧръёсын

Тӧдьы пуштрес пилем борды ошем ӟечыранэн ӟечыракуз Шунды нылаш тодмотэм музъемез адӟиз. Со музъем чылкак огназ вал, со тыбыр вылаз выдыса улӥз, пыдъёсыз но киосыз вӧлъямын. Шунды нылаш ноку но таӵе музъемез ӧз на адӟылы вал. Ӟечыранзэ вунэтыса со Тодмотэм Музъем шоры вань син но пель кужымзэ золтыса долкаса улӥз. Тодмотэм Музъем ас понназ вераськиз.

- Ой, кыӵе умой! – шуиз кадь со, нылаш рос-прос кылыса ӧз вуы.

Собере Тодмотэм Музъем паллян пыдзэ куасалтӥз но бур пыдзэ паллян пидес вылаз понӥз.

- Ой, кыӵе умой! – табере та кылъёсты Шунды нылаш туж ӟеч кылӥз.

Тодмотэм Музъем киоссэ йыртыш улаз карыса нош ик «Ой, кыӵе умой!» шуиз. Собере со шӧдтэк шорысь кӧт вылаз погыльтӥськиз. Выросъёсыз воштӥськизы, ӝогак гинэ пал урдэс вылаз кариськыса, Тодмотэм Музъем котырзэ учкиз. Собере мукет пал урдэс вылаз кариськыса мукет пал котырзэ учкиз.

- Ааа, - валаз Шунды ныл, - озьы Музъем очкизэ утча вылэм!

Вожектэм вуж очкизэ ныр вылаз интыяса Музъем нош ик марзэ ке но утчаны кутскиз.

- Мх, мх, мх, - малпаз нылаш, - тунсыко, тунсыко!..

Ӝоген Тодмотэм Музъемлэн кияз ручка но тетрадь сюризы. Вӧзысьтыз тэркыысьтыз мае ке но куртчыса (оло тари ӝук вал отын, оло лыз сыр, - ныл валаса ӧз вуы), Тодмотэм Музъем выдэм куеныз ик гожъяськыны кутскиз. Гожъяськон вакытаз солэн ымыз выремысь дугдылӥз. Гожъяськонзэ вис карыкуз ымыз нош ик вырыны кутскылӥз.

- Озьы тӥни, - ас понназ вераськиз Тодмотэм Музъем.

- Ой, кыӵе тунсыко, - малпаз Шунды ныл. Татчыозь со уно гожъясьчиосты адӟылӥз, но одӥгез но тазьы выдыса ӧз гожъяськы. Ӝӧк сьӧрын пукыса гожъяськизы мукетъёсыз, югыт дэремен, галстукен, костюмен… Нош таиз чылкак гольык кылиськемын… Таӵе гольык гожъясьчиез Шунды ныллэн адӟылэмез ӧй вал на.

Бен, вераськизы вал адямиос, гожъясьчиос калык азьын гинэ асьсэды чебер возё шуыса, нош огшоры, нуналысь нуналэ улонын, соос, пе, ӵемгес кудӟылэмын луо, абыршак дӥсясько… Нош гольык кариськыса гожъяськон сярысь Шунды ныл ӧз на кылылы.

- Ой, ой, ой, - малпаз Шунды ныл, - кыӵе тунсыкоооо!

Со куспын Тодмотэм Музъем чашаысь ву ӟузьыса пыд йылаз султӥз но пижамазэ дӥсяз.

- Ой, - кышкатскиз нылаш, - оло со мынэсьтым малпанъёсме кылӥз шат?!

Нош Музъем ас малпанъёсыныз улӥз, шӧдске. Со тетрадьзэ ӝӧк вылэ шудон картаосты сямен сальк! куштӥз но «Озьы тӥни» шуиз. Собере пукон вылэ пуксиз, очкизэ ныр вылысьтыз басьтӥз но кырым пыдесэныз синъёссэ зыраз. Вушйиз. Тетрадьзэ усьтӥз но гожъяськыны ӧдъяз.

- Пижамаен гожъясьчи!!! – пырсйиз Шунды ныл. – Ой, кыӵе ту-мо-шо!!!

Шӧдтэк шорысь со Тодмотэм Музъем доры пӧртэм инсьӧр кунъёсысь кунмуртъёс люкаськизы. Соосты адӟыса гожъясьчи ӝогак гинэ югыт-лыз дэремзэ, костюмзэ вылаз дӥсяз, галстуксэ думиз.

- Аааа, тӥни кыӵе вылэмеееед! – паймиз нылаш.

Тодмотэм Музъем кема вераськиз калык азьын. Лыктэм калык сое сак кылзӥз, «бен, бен» шуыса йырынызы мыкыръязы, куд-огез нош ымзэ усьтыса ик Тодмотэм Музъем шоры учкыса улӥз.

- Ой, кыӵе визьмо!

- Макем шонер кылъёс!

- Сыӵе чебер! - Кылӥськиз котыр.

Собере калык вераськыны кутскиз. Огез бӧрсьы мукетыз кыл куризы вож но лыз, горд но ӵуж элькун кунмуртъёс. Тодмотэм Музъем куд-огзэ сак кылзӥз, куд-огезлы мытылӥз, нош куд-огез вераськыку со умме усьылӥз. Сыӵе дыре «кокаськыса» пукемъяз Тодмотэм Музъем тедрадяз маке но гожъямъяськиз. Калыклэсь возьдаськыса, вылды. Но, зэмзэ ке, со вакытэ Тодмотэм Музъем номыр но ӧз гожъя. Тае Шунды нылаш туж ӟеч валаз.

• Ой, кыӵе ту-мо-шо! – серекъяз нылаш.

Кужмогес ӟечыраса со валаны тыршиз Тодмотэм Музъемлэн усьтэм тетрадьысьтыз пусъёссэ.

- Мон кылли тӧдьы пуштрес пилем вылын, ангесме киосы вылэ поныса, ымнырыным – музъеме, – куд-ог макеос мыным огшоры ӧвӧл кадь потылӥзы. Кизер-вож возьвыл инбам луиз, со возь вылын будӥсь лулпуос – пилемъёс, нош ӵуж вакчи дэремен дисяськем, шундыен пыжем пыдъюмыло, кузь, вуэм чабей кадь йырсиё но маке быдӟа лыз синмо нылаш Шунды вал, - лыдӟыса вуиз Шунды нылаш. – О! Ой, ой, макем тунсыко!

Нош ӟечыран со дыре берлань сётскиз. Шунды ныл туж дыртӥз, солэн одно лыдӟемез потӥз та Тодмотэм Музъемлэсь гожъямзэ. Нош ӟечыран нылашез берлань нуиз. Нылаш адӟиз калыклэсь кошкемзэ, Тодмотэм Музъемлэсь ӝӧк сьӧрысь султэмзэ, тетрадьзэ ворсамзэ, дыртыса кыӵе ке но лапег мугоро юбкаен кышномурт сьӧры кошкемзэ.

- Малы озьы! - ӟечыранзэ тышкаськиз нылаш. – Малы ӟечыранэз дугдытыны уг луы вал со Музъемлэн тетрадез вадесэ!!! Малы тон, ӟечыран, сокем каллен, сокем визьтэм, сокем огшоры, сокем мӧзмыт, ну сокем… Мынам кылы ик ӧвӧл вераны, кыӵе тон… ог-шо-ры!!! Тынад тормозэд но, рулед но ӧвӧл!!! – тышкаськиз ӟечыранзэ нылаш.

- Кылзы ай, нылы, - шуиз шунды сиё Ӟечыран, - макем бергес, сокем умойгес.

- Мммм-ой, кыӵе тон визьмо но мӧзмыт!!! – ымдуръёссэ пеперъяса вожзэ поттӥз Шунды нылаш.

Пыдъёссэ азьлань карыса, вань кужыменыз зӥбиськиз со ӟечыран вылэ.

- Ӟе-чы-раааан! – кеськиз нылаш.

Ӟечыран сое лулыз шурдымон вылӥе ӝутӥз. Ӝутӥз но… Кельтӥз-а мар-а? Нылаш ӧз шӧды ни улысьтыз сое кутӥсь зарни пуэз, киосыз ыштӥзы шунды си ӟечыран гозыосты.

- Бен ӟечыран гозыос шунды сиос вал ук, кызьы озьы соос монэ тазьы тани лэзизы? – улӥе усёнъяз паймыса вуиз на нылаш.

Пыдэстэм сьӧдэ усёнъяз ныллэн горд йырсиосыз тӧлъя сэрттӥськизы. Соку ик каньылгес луиз улӥе лобыны, сокем ӝог усемлэсь йырсиос утизы, соос, парашют сямен, котыр вӧлъяськыса нылашез омырын возизы. Табере нылаш каллен гинэ кытчы ке но тодмотэме лобиз. Йырзэ выретэмез ӧз луы, йырсиос омырез возизы бере, чырты золтӥськемъя мугор гинэ бергаз. Йыр ӧз берга. Соин ик нылаш котырзэ ӟеч адӟыны ӧз быгаты. Синъёссэ отчы-татчы бергатыны туж тыршиз ке но. Син шораз йӧтэм суредъёс солы мӧзмыт потӥзы. Тыбырыз лыдыны кутскиз. Нылаш олокызьы но киоссэ куасалляса, пыдыныз омырез ӵыжаса тыбырзэ корманы тыршиз.

- Ма мар та таӵе!? Лыдэ ук! – шуыса, нылаш тыбырзэ корманы амал шедьтӥз. Зэм, огпала но вырисьтэм йырын но ялан васькись мугорен секытгес вал ма ке но карыны. Тыбырысьтыз нылаш кык бугоръёсты шӧдӥз.

- Аааа, тани мар лыдэ вылэм! – шумпотӥз нылаш лыдӥсь интызэ шедьтэмезлы. – Мар та таӵе? Ой-ой, кыӵе татӥ вӧсь!!!

Нырысь нылашлэн тыбыраз сюрлыезлэн кык палаз ик потӥзы кык йыло пыктосъёс. Со пыктосъёс будӥзы.

- Ой, оооой, вӧсь! Вӧӧӧӧӧсь! – кесяськиз нылаш.

Со вакытэ пыктосъёс кесиськизы но ныллэн тыбырысьтыз кыре потӥзы горд аспӧртэмлыкоесь бурдъёс. Соос кык йыло вал. Нылаш соосты ӧз адӟы, шӧдӥз гинэ. Со тыбыр вылысьтыз сӥль быгытъёссэ золтӥз но выль мугор люкетъёссэ шӧдӥз. Тыбыр быгытъёссэ золтонъяз со выль мугор люкетэзлэсь выремзэ шӧдӥз.

- Ма мар со сыӵе!!! – кышкаса но паймыса малпаз нылаш.

Тыбыр быгытъёссэ выретӥз – выризы тыбырысьтыз со выль мугор люкетъёс но. Шӧдтэк шорысь ныллэсь мугорзэ оло тӧлэн, оло маин палэнэ сэрпалтӥз.

- О! – шуиз нылаш, выльысь ассэ шедьтэмез бере. – Мар вал со?

Нош ик выретӥз тыбыр быгытъёсэ, нош ик вырыны кутскизы выль мугор люкетъёс. Нош ик ныллэн мугорыз омырын берытскыса шуак палэнэ лобӟиз но выльысь улӥе огсыр васькон ӧраз париз.

- О! – нош ик кеськиз нылаш. - Бурдъёс? Бурдъёс!!!

Табере со выретӥз тыбырызлэн огпал быгытъёсыныз – мугорыз огпала сётскиз. Выретӥз тыбырызлэн мукет пал быгытъёсыныз – мугорыз мукет пала лобӟиз. Озьы лобанъяз нылаш бурдъёссэ адӟыны тыршиз. Соос гордэсь вал, кык йыло.

- Бурдъёёёёс! – шумпотыса кеськиз нылаш.

Со дыре тыбырзэ бышкалтэм кадь вӧсь карись луиз. Нылаш вӧсь луэмезлэсь вань мугорыныз азьлань сётскиз но йырсазьзэ ыштӥз. Бурдъёс, табере ныллэсь тыбырзэ сюрлы кузьласянь кесьыса, эшшо но бадӟымгес луизы. Ныллэн мугорыз азьвыл сямен ик, каллен улӥе лобиз. Суй-пыдъёсыз ӧз выре. Йырсазьзэ ыштэм йырын жондӥзы валантэм куараос: кортэ шуккем, трамвай кесяськем, поезд йыггетэм, адями черекъям, зырымез кыскыса жоб дыльды сялӟем куараос, Вотянка! Вотянка! ӧскыса вукекъяськем, За проезд, пожалуйста! Туууу! Да, алё! Пииик! Ты чё, бля! Раадио Моя У….

Нылаш чутрак сайкиськиз. Вузэ ыштэм чорыг сямен ымыныз омырез пушказ кыскиз.

- Кыӵе умой, мон татын, мон лобисько, мон улэп, - нош ик котырысьтыз юз чылкыт омырез шокчиз нылаш. – Нош мар со вал?

Соку нылаш шӧдӥз тыбырызлэсь чидантэм зол висемзэ.

- Мар со вал? Отын, кытын мон вал? – та чалмытын со олокытысь кылэм куараос нылашлы валантэм тодэ ваён кадь маза ӧз сётэ.

- Мар со вал? Татын… мон татын, вӧсь маке, но макем умой! – шуиз нылаш.

- Ой, кыӵе умой! – кылӥськиз туж матын.

- Ой, кыӵе умой! – пельызлы оскытэк сипыртӥз нылаш.

- Мхы, кыӵе умой! – нош ик кин ке но вазись луиз.

- Аааа, - тодмаз нылаш ӟечыранысен кылэм кылъёсты, - Тодмотэм Музъем! Кыӵе умой!

Шумпотэменыз нылаш «Урааа!» шуыса кесяськиз, киоссэ вылэ ӝутӥз, пыдъёссэ омырын вӧлъяз но… тыбырысьтыз чутрак ӝутскем вӧсь нош ик нылашез йырсазьтэк кельтӥз.

- Тон кытысь кин таӵе? – юаз Тодмотэм Музъем нылаш синъёссэ усьтэм бере.

- Мон… мон Анайысь-Атайысь Шунды ныл, – шуиз нылаш.

- Нох, - шуиз Тодмотэм Музъем, - соиз валамон. Тодмотэм Музъем ныллэсь чорк сылӥсь йырсиоссэ пунӥз.

- Мон тонэ тодӥсько, - шуиз нылаш.

- Кытысь? – паймиз Тодмотэм музъем.

Собере нылаш вераз ӟечыранысен адӟемъёссэ.

- М-да, - кельшиз Тодмотэм музъемлы нылашлэн верамез, - туж умой. Кылиськы.

- Мма, мма, - бакомиз нылаш.

Тодмотэм музъем нош со вакытэ кылиськиз ни, пукон шедьтыса, кыльылэм дӥсьёссэ пукон вылэ куяз. Чылкак гольык кариськыса со ныл доры лыктӥз.

- Пижамадэ дӥся, - гордэктӥз нылаш.

- Малы? – паймиз Тодмотэм Музъем. – Выльысь кылиськоно луоз ук.

Со ныллэсь дӥсьсэ кыльылыны кутскиз.

- А! – черектӥськиз Шунды нылаш. – Мынам тыбыры!!!

- Оооо, - шуиз ныллэсь тыбырзэ учкыса Тодмотэм Музъем, - ма тон огшоры вылымтэед ук! Чаль али татчы, выд.

Тодмотэм Музъем ныллэсь тыбырзэ маялляз, выль потэм ненег горд бурдъёссэ чупаз, кытысь ке но кык синучкон вайыса нылашлы выль потэм мугор люкетъёссэ возьматӥз. Нош нылашлы тунсыкогес потӥз Тодмотэм Музъемлэн мугор люкетъёсыз, тужгес но соиз, кудӥз аслаз нылашлэн мугораз чик ӧй вал.

- Тынад бурдъёсыд вань, - валэктӥз Тодмотэм музъем. – Тон соосты вӧлъяськод ке, соос толэзь пужы кылдыто. Со пужы горд буёло.

- Малы тыбырылы сокем вӧсь?

- Малы ке шуоно, бурдъёс али гинэ потӥзы ай, соос табере тыныд вӧсь уз ни каре, соосын тон кужмо луод.

- Кытысь тон тодӥськод? – юаз Шунды ныл.

- Мынам но бурдъёсы вань ук, - шуиз Тодмотэм музъем. - Учкы али тыбырме.

Озьы вераса но ас понназ малы ке но пумтэм шудо мыняса Тодмотэм Музъем кӧт вылаз выдӥз. Шунды ныл кема ветлӥз солэн тыбыр вылтӥз. Номыре но ӧз шедьты.

- Кытын бурдъёсыд? – юаз ныл.

- Тани, тани, киыныд корма али! Вылӥтӥгес!

- Кытын? Малы мон уг адӟиськы? – чылкак паймыса Тодмотэм Музъемлэсь тыбырзэ туж тыршыса кормаз нылаш.

- Бен, бен, улӥтӥзгес, вох, вох, ой, кыӵе умой! Шедьтӥд ук!

Шунды ныл номырзэ но ӧз адӟы. Ӟигарыз гинэ чылкак быриз.

- Мон ӧй адӟы, - шуиз со тыбыр вылаз выдыса.

Паймымон, солэн тыбырыз чик ӧз ни висьы, бурдъёссэ Шунды ныл шумпотыса йӧтылӥз, тыбыр быгытъёссэ золтылыса бурдъёссэ выретылӥз.

- Тон сокем тунсыко! – шуиз Тодмотэм Музъемлы нылаш. Мон тонэ Тодмотэм Музъем шуыса нимай. Яралоз-а?

- Яралоз, - шуиз Тодмотэм Музъем.

Собере со возьматӥз нылашлы аслэсьтыз кунзэ.

- Ой, кыӵе умой татын! – паймиз Шунды нылаш.

Оло мугор воштӥськемзэ, оло бурд потэмзэ, оло та кунлэсь кырӟанъёссэ кылыса, Шунды нылаш ассэ туж эрикоен шӧдӥз. Бурдъёссэ вань пасьталазыя но кузьдалазыя вӧлъяса поръяз со Тодмотэм Музъемлэн элькунтӥз.

Оломар но выльзэ тодӥз соку Шунды нылаш. Выль кун сярысь гинэ ӧвӧл, ачиз сярысь но.

- Ӟечыранэ, - тодаз лыктӥз нылашлы ӟечыранэз.

- Мон но ӟечыран, - шуиз Тодмотэм Музъем. – Киосы - ӟечыран гозыос. Кутӥськы!

- О, кыӵе кужмоесь! – паймиз нылаш.

- Таиз ӟечран пу. Эн кышка! – пыдъёс вискысьтыз мугор люкетсэ ныллэн пыд висказ понӥз Тодмотэм Музъем.

- Ой! Табере мынам улонэ быриз! - ӝоже усиз нылаш кӧт пыдсысьтыз мур вӧсез шӧдыса. – Табере аптекае мыныса эмъюм басьтоно, сотэк мон пияно луо.

- Шузи, - вазиз Тодмотэм Музъем. – Тынад улонэд ӧз быры, тынад улонэд озьы кутскиз гинэ. Кыӵе тон егит! Кыӵе трос тыныд улоно но шӧдоно на! Нош эмъюмъёс сярысь мон медам кылы! Мон нылпиосты яратӥсько!

Озьы соос ӟечыразы. Инсьӧръёсысь гудыриос дорозь, инсьӧр зарни ӧсысь вуос кыриськытозь.

- Кытысь тон ваньзэ тодӥськод? – паймыса юаз нылаш Тодмотэм Музъемлэсь.

- Мон кема улӥ ини. Мынам лызо-тӧдьыё бурдъёсы кемала-а-а-сь пӧсьтӥзы ини. Табере мон соосты корка бордам ошыса возисько, куддыръя гинэ бырттылӥсько, лобаме мынам соостэк но луэ табере.

- Аааа, озьыен, тон монэ пӧяд! Огшоры аслэсьтыд тыбырдэ корманы косӥд!

- Бен, - мыняз Тодмотэм музъем. – Огшоры бурдтэм тыбыр но лыдэ, нош тон кормаськод ке, мыным кельше.

- Тон сокем бадӟым но кужмо, тон огнад быдэс элькун быдӟа. – Паймемысь ӧз дугды нылаш.

- Тыныд гинэ озьы адске, - шуиз Тодмотэм Музъем. – Мае тон дуннеысь котьмарлэсь зол яратӥськод?

- Мон я-ра-тӥсь-ко Шундыез, Инсьӧрез, Вуэз, Тылэз, Омырез, Музъемез, Ӟечыранме, Анай-Атайме… Нюлэсэз, Узыез, Борыез, Улмоез. Мон вань дуннеез яратӥсько! Мон тонэ но яратӥсько!

Озьы Шунды нылаш ассэ туж шудоен шӧдӥз та Тодмотэм Музъем вылын. Со татысь котькуд вырзэ-гопсэ эскериз. Тодмотэм Музъем кадь шоканы, ветлыны, вераськыны, малпаськыны дышетскиз. Музъем Шунды нылашез кияз кутыса котькуд нунал нырысьсэ сямен маялляз, чупалляз, ас улаз ӝикытак интыяса ӟечыратӥз. Соку тупазы ымдуръёс, гадьёс но кӧтъёс, кӧт улысь интыос но пидесъёс. Шунды ныл Тодмотэм Музъемезлэн пӧсь гудыри зоръёсыз улын эркытак лэйказ. Тодмотэм Музъемезлэн нодлыко но чидаса дышетэмъёсызъя Шунды ныллэн бурдъёсыз чебер-горд, кужмо будӥзы.

- Луоно ӟеч сюлэмо, нодлыко, зэмлыко, дӥсьтӥсь, - Тодмотэм Музъемлэсь верамзэ сипыртӥз нылаш. – Ожез, виёнэз мон адӟемпотостэм карисько. Мынам гожъямъёсы дуннелы ӟечсэ гинэ ваё.

- Шо-нееер! Мын табере, лоб! – косӥз одӥг пол Тодмотэм Музъем, Шунды ныллэсь нодлыко вераськемзэ кылыса, тыршыса но сюлмо дышетскемзэ адӟыса.

- Кытчы? – котыр учкыса номырзэ валатэк юаз Шунды ныл.

- Отчы, кытын тон луыны кулэ, отчы, кытын тынад доред, - шуиз тодмотэм музъем.

Шунды ныл ӧз тоды, мар карыны. Таӵезэ со нокызьы но син азяз ӧз пуктылы, ӧз но дышеты, ӧз но лыдӟы нокытысь.

- Мын, лоб! Тон кужмо! – косӥз Тодмотэм Музъем.

Шунды нылаш сылӥз Тодмотэм Музъем вылын, мар карыны валатэк, син азяз бергазы ортчем нунал суредъёс, горд бурд пусъёс, ӟечыран…

Соку Тодмотэм Музъем Шунды нылашез ас вылысьтыз тэшкыльтыса лэзиз.

- Лоб, кылӥськод-а? Тон быгатод, тон кужмо! – шуиз.

- Ээээээн! – чузъяськиз инсьӧр бугорын. – Уууууг!

Ныллэн мугорыз Тодмотэм Музъем бордысь палдыса уллань лобиз. Бурдъёсыз сярысь Шунды ныл оло вунэтӥз, оло соос та вакытэ ӧз ужалэ. Суй-пыдъёсыз но ӧй вал кадь ныллэн. Пеляз жондыса улӥз Тодмотэм Музъемезлэн «Мын, лоб!» шуэмез.

Тодмотэм Музъем Шунды нылашлэсь тазьы усемзэ чакласа улӥз. Со нылаш лобон интые ки пыдэссэ пуктӥз но, Шунды нылашлэн мугорез солэн ки пыдэсаз васькиз.

- Ой тон пичие мынам! Валасько, вождэ эн вай, но мукет сямен уг луы ук, тыныд лобано, – сипыртӥз Тодмотэм Музъем Шунды ныллэн пеляз.

- Кышкыт, - выризы ныллэн ымдуръёсыз, - макем вӧсь но кышкыт!

Ныллэн синъёсыз паськыт усьтэмын но синвуэн тырмемын вал.

- Мынам уг поты лобаме, - ялан но ялан сипыртӥзы солэн ымдуръёсыз пумтэм викышъян кусыпаз.

- Малы тон ялан бӧрдӥськод? – бадӟым чылкыт синъёсын учкиз Тодмотэм Музъем ныллэн синкылиен тырмем синъёсаз, отысь валэктонэз адӟыны тыршыса.

Нылашлэн мугорыз ӧз выры, синъёсыз озьы ик паськыт усьтӥськемын, синвуэн тырмемын вал. Тодмотэм Музъем шедьтыны тыршиз со синъёслэсь пыдэссэз. Улэмъя-вылэмъя, Тодмотэм Музъемезлэн лякыт ненег йӧтскемъёсыз бере, огпол со синъёсысь синвуос шур кадь ӧръяськизы, соку Тодмотэм Музъем адӟиз шӧтэм кышкыт суредъёсты: Шунды ныллэн син пыдэсаз вал пумтэм ож суредъёс. Соос пумтэм трос вал, вирен орсмемын, котыр сӥль моклокъёс.

Ныллэн ымдуръёсыз выризы:

- Таиз песятае. Ож. Таиз атае. Ож. Таиз выны. Ож. Горд бурдъёс. Качы. Танк. Пӧсь. Армия. Корос артана. Завод. Пыӵал. Калык. Корт тубатъёс. Иднакар. Герд. Ашальчи. Кедра. Удмурт. Вӧсь. Эн. Тон.

Собере ныллэн мугорысьтыз потыны кутскизы шӧтэм куараос: кортэ шуккем, трамвай кесяськем, поезд йыггетэм, адями черекъям, зырымез кыскыса жоб дыльды сялӟем куараос, Вотянка! Вотянка! ӧскыса вукекъяськем, За проезд, пожалуйста! Туууу! Да, алё! Пииик! Ты чё, бля! Раадио Моя У…. Витт. Куид пардипоэг он вейке. Минэ нююд эра. Сама яма. Тибла. Сына сааб теокс. Ленда нююд! Топай!

Нылаш чутрак сайкиськиз. Со котыр учкиз но валаз Тодмотэм Музъемлэн кипыдэсаз кылле шуыса.

- О, мусое, пичие тон мынам, - ныллэн сазьтӥськемезлы туж шумпотӥз Тодмотэм Музъем. Жаляса но мар карыны валатэк учкиз со ныллэн мугорыз шоры. – Мон тонэ яратӥсько ук, яратӥсько.

Тае кылыса, Шунды ныл юн ӟыгыртӥз Тодмотэм Музъемезлэсь пӧлызэ. Озьы со умме усиз. Сайкаса Шунды нылаш кема эркияз Тодмотэм Музъемезлэсь мугорзэ. Мӧзмем мугорыныз солэн бордаз ӝиптӥськылӥз. Пумтэм чупалляз. Тодмотэм Музъем куддыръя пумтэм шумпотыса быдэс инсьӧр дунне тыр кизьнылӥз. Шунды ныл уй-нуналэн Тодмотэм Музъемзэ эркияса куддыръя жадьылӥз. Соку со Тодмотэм Музъемезлэн пыд вискысьтыз мугор люкетэз вылэ кариськыса умме усьылӥз. Умйылтӥз кылӥз Тодмотэм Музъемлэсь кылъёссэ:

- Милемлы ӵошен таӵе умой бере, уломы на. – Лулӟылӥз Тодмотэм Музъем.

- Тон мынам доре, мон тонэ яратӥсько, - сипыртӥзы Шунды ныллэн ымдуръёсыз. Синъёсысьтыз нош со кышкыт учыр бере ялан быльыраса улӥзы синкылиос.